من طرف [ندعوك للتسجيل في المنتدى أو التعريف بنفسك لمعاينة هذا الرابط]
ليه يا حبيبي بتقلق من سكوتي ؟
وليه بتستغرب ؟
متستغربش ..
مش دايما سكوتي بيكون حزن أو غضب ..
ساعات بكون فرحانه أوي ..
بحس إنني مش محتاجه حاجه م الدنيا غير جناحين !
ساعتها بس .. بحس إنني مهما وصفت اللي جوايا
مش هيطلع منني غير أشباه كلمات عمرها ما هتوصف
عمق الأحاسيس اللي جوايا ..!
متستغربش ..
لما تقوللي بحبك ، وأبصلك وأكتفي بالإبتسامه اللي بتعشقها !
ساعتها يا حبيبي .. بيكون صعب أوي عليا إختزال كل المشاعر اللي جوايا دي في كلمه بسيطه زي بحبك ..
متستغربش ..
لما تكون بتتكلم في حاجه ، وفجأه .. ومن غير أي مقدمات
أبصلك اوي وأقولك
" بحبك " ..
ممكن يسموه جنان .. هوس ..
بس ، ببقي حاساها أوي يا حبيبي ..
ومتستغربش يا حبيبي ..
لما فجأه نسكت وأنا أضحك زي الأطفال بصوت عالي ،
وإنت تبتسم أوي وتبقي عايز تعرف أنا بضحك علي إيه !
أقولك علي سر ؟
أنا نفسي ببقي مش عارفه أنا بضحك علي إيه !
يمكن جوايا سعاده كبيره أوي ومش عارفه أترجمها فبتطلع كده ..
يمكن بضحك ع اللي فات وعندي أمل في اللي جاي ..
اممم .. يمكن بعلن التحدي علي الدنيا بأعلي صوت ..
مانا مش خايفه عشان إنت معايا .. : )
متستغربش ..
لما أسألك علي حاجه ، رغم إنني عارفه إنك هتقول لأ !
أصلي بفرح أوي يا حبيبي وأنا بقولك " حاضر " !
بحب أحس إنني بنتك اللي متقدرش تخالف أوامرك ..
رغم إنني عمري ما سمحت لحد يأمرني !
متستغربش ..
لما تحس إنني بعشق غيرتك لما بتزيد ! وبحب نرفزتك أوي !
أصلي بحب أحس إنني مينفعش أكون غير بتاعتك .. إنت وبس يا حبيبي ..
متستغربش ..
لما تحس إنني بغير عليك من نسمة الهوا اللي بتعدي جمبك !
لما أقولك إنني بغير من موبايلك عشان ماسكه وأنا لأ !
ولما أغير عشان راكب عربيتك ومش أنا اللي جمبك !
ولما أغير من سريرك عشان هو اللي بيحتويك وإنت نايم !
ولما .. أسألك عن أخبار أصحابك عشان دايما بحسدهم لما بتكون معاهم !
متستغربش ..
دانا ساعات بغير عليك مني !
مجنونه !
مجنونه بحبك يا حبيبي : )
ومعنديش راجل غيرك أتجنن بيه .. وعليه !
متستغربش ..
لما أقعد أحلم بيك ..
وأحلم بديكورات شقتنا ..
وأفكر في أسامي ولادنا ..
وأرتب ليوم جوازنا .. مع إنني عارفه إن لسه بدري مش بدرى أوى يعنى !
متستغربش ..
لما أقول إن اللي فات قليل أوي !
أصل أنا متأكده يا حبيبي إنني هعيش معاك قد اللي فات مليون مره لو ربنا طول في عمري شويتين ..
متستغربش ..
لما تفتح الـ Calendar علي موبايلي وتلاقي كل يوم Reminder بحاجه حلوه حصلت بيننا مهما كانت بسيطه !
ولما تلاقي Record لأي مكالمه حلوه بيننا ..
أصل التفاصيل البسيطه دي يا حبيبي هي النكهه اللي بتجمل طعم حياتنا ..
ومتستغربش يا حبيبي ..
لما أقولك إنك أول حد حبيته وهحبه !
دلوقتي بس عرفت الفرق بين الحــب .. والحب !
عرفت أفرق بين شعرة المراهقه والشباب ..
عرفت إن اللي فات من عمري مجرد كوميديا !
معاك ..
عرفت معاني جميله أوي ..
لقيت حاجات يا حبيبي كنت بكتب عنها ..
وبحلم بيها بس عمري ما لقيتها في الدنيا ولا هلاقيها غير وياك ..
عرفت يعني إيه تحب في حد حبه ليك ، ويعني إيه تحب حد عشان
ده " هو " !
بتحبه كده زي ما هو ..
بعيوبه قبل مميزاته .. بكل تفاصيله ..
عرفت إن السعاده بتكمن في التفاصيل !
آمنت إن نظرة رضا واحده أو إبتسامه من حد بنحبه
بتكفينا أوي .. أوي ..
وآمنت إن الحب بيقوي بعد كل مشكله ،
علي عكس الحب اللي ممكن يتدمر من أي حاجه !
عرفت يعني إيه تحب حد أكتر من نفسك ..
عرفت قد إيه أنا ليا قيمه .. بس ، عشان إنت حبيبي !
وهتفضل طول عمرك حبيبي ..
أصل الحــب .. عمره ما هيموت ..
حتي لو أنا مت يا حبيبي .. حروفي هتفضل عايشه بس عشان
تعلن قد إيه عشقتك .. وعشقتك !
