من طرف yoha الإثنين مارس 23, 2009 12:53 pmكلمنى شكراً .........ايه تانى ؟ من الهجص ووجع الدماغ
طبعا الكل عارف الخدمة دى اللى تقدمها شركات شبكات المحمول فى مصر واللى بتدى لكل مستخدم أنك ممكن تبعت 3 رسائل مجانية يوميا و دلوقتى بقوا 5 مضمونها " كلمنى شكرا.. Please Call Me "
طبعاً نظراً لأن شعبنا هو الشعب الوحيد فى العالم الذى أخترع " الميسد كول " وتفنن فى أستخدماته فمثلا لما اتنين بيحبو بعض يتفيصو ( يتفارقو ) يقول الولد للبنت " لما توصلى البيت أبقى أدينى رنة "
أو لما يتفق اتنين على مقابله بعضهم فى مكان يقول الواحد للتاني " لما أوصل هناك هديك رنة تعرف انى وصلت ومستنيك " وغيرها من الأختراعات.
فى الاول اللى كانت بتجيله الرسائل دى... كان اللى بتوصله الرسالة يفتكر أنها فعلا مكتوبة من حد عايز يكلمه .. ويتصل بيه فعلا ويلاقي صاحبه بيهزر معاه...
وطبعا مع أنتشار الخدمة بسرعة الصاروخ ( كعادة الشعب المصرى ) أصبحت لهذه الخدمة لغة أخرى يتحدث بها شعب مصرنا الحبيبة..
فبدل الميسدات بقت رسالة كلمنى شكرا... فلما تسمع رنة مسج فى أى موبايل ... أعرف أنها رسالة كلمنى شكرا ......
لدرجة أن الغتت اللى بيستعملها قبل ما تيجى12 باليل بيبعت ال3 رسائل لأى موبايل وهو مش عاوزهم أصلا...
ومثلا واحد عايز يطمن على حبيبته..فيبعتلها "كلمنى شكرا" يعنى ازيك
تقوم هى ترد عليه و تبعتله "كلمنى شكرا" برده يعنى انا كويسه
وغيره وغيره وغيره
زى مايكون الشركه اخترعت الخدمه عشان يضحكوا علينا مع انها ببلاش مش زى أتصل بزيرو تسعمية تكسب ميت ألف جنيه ويجبلك اعلان لواحده مايصه وماسكه تليفون
ومع ذلك المثقفون اختلفوا
فمثلا المتدينين أعترضوا على رسالة " كلمنى شكرا " وقالوا ليه متكونش الرسالة تحتوى على مضمون دينى مثل
" كلمنى جزاك الله خيراً " أو " كلمنى الله يعوضك عليك "
والأشخاص ذوي المشاعر والأحاسيس الرقيقة أعترضوا عليها وقالوا لماذا لا تكون الرسالة " كلمنى ميرسي "
و مننساش البنات طبعا لأنهم طالبو بمقاطعة رسالة " كلمنى شكرا " فى كونها تخاطب المذكر
وطالبت جمعيات الدفاع عن المرأة بتغير كلمة " كلمنى " بكلمة " كلمينى " ....
هيفضلوا يهزءوا فينا لامتى؟ وبالمناسبه حاليا بالاسواق خدمه "اشحنلى شكرا"
نظرا لان الشعب المصرى كريم ومعطاء (أوي) ومش ممكن يقول لا فى حاجه زى دى
وانتظروا قريبا خدمه "رد عليا شكرا"
