من طرف عاشق ولهان الأربعاء ديسمبر 03, 2008 6:03 amبسم الله الرحمن الرحيم
بصراحة انا مش عارف ابدا الموضوع ده منين .. الموضوع بجد خطير اوى وماحدش واخد باله منه او بمعنى اصح احنا خلاص اتعودنا عليه .. باختصار كل واحد منا مستقبله وحياته بتحدد ويترسم وهو عنده 16 سنه يعني الفترة اللى بتكون قراراته كلها غلط (سن المراهقة) كلنا عارفينه طبعاً وعارفين ايه اخطار السن ده .
القصة بتبدا من المرحلة الاولى فى الثانوية العامة وبيكون الولد عنده 15 سنه بالظبط وبينتهى تحديد المصير فى المرحله التانيه يعني سن 16 سنه وبتنتهى الفترة دي بدخول الكليه اللى فى الغالب مش على مزاج اللى داخلها وكلنا طبعاً عارفين ان فى السن ده الولد كله همه انه يلعب مع اصحابه ومش عايز يسمع كلمه مذاكرة دي من اهله ومش عارف انهم صح وهو هايندم اشد الندم بعد كده وطبعاً بيترتب على كده نتائج كتيرة اوى اهمها :-
مستواه الدراسى بيكون زي الزفت لانه مش طايق يسمع اسم الكليه او سيرتها
الاكتئاب من العيشة
بيشوف مستقلبه انه مستقبل اسود مش باين له ملامح
امله فى الدنيا بيكون ضعيف (الامل في الله طبعاً) بس للاسف اغلب الشباب دلوقتي بعيد عن ربنا
وياسلام بئى لو لقى بنت حبها فى الجامعة كده يبئى فتح على نفسه بوابة من بوابات جنهم ويبدا صحبنا الشيطان يمسكه بئى هاتتجوز منين هاتشتغل ازاي حياتك ملخبطه ماحدش هيساعدك مش هاتلاقي شغل بعد ما تخلص هاتلاقي واحد معاه فلوس هايجي ياخدها قدام عينك وانت واقف زي الكلـ ... وطبعاً انتو عارفين الشيطان لما بيحط حد فى دماغه بيخليه يكره حياته .
ومشاكل تانى كتير اوى كلنا عارفينها لو قعدت اتكلمت عليها مش هايفكينا اسبوع .. طبعاً كل ده من نظام التعليم المتخلف اللى ماشية عليه مصر .. وعلشان تشوفوا الشلل ممكن يكون واحد تعب وذاكر وموت نفسه لحد ما جاب مجموع ودخل بيه كله طب قعد 7 سنين يدرس على سنه تخصص على سنه ماجستير يعني حسبه 10 سنين ويطلع يشتغل بـ 240 جنيه مع الحوافز وكل شئ وعلى الجانب التاني نلاقي شخص فاشل دخل كليه حقوق بالعافيه 4 سنين وطلع منها لقى بابا دفع له مبلغ او له وسطه جامده بئى وكيل نيابه معاه سلطه وفلوس وكل شئ والكل طبعاً عارف ايه هى النيابه (وصدق المثل حينما قال لو نهر النيل صلصه مش هايكفى الكوسة اللى فى مصر) .. وحاجات زي كده كتير اوى .
بس للاسف اللى حاطط نظام التعليم المتخلف ده هى ماما امريكا وعارفين طبعاً مين اللى ورا ماما امريكا وعايزة تدمر كل طاقة الشباب اللى ممكن تهد جبال وتبئى ارقى المدن .. وبإذن الله انا هاحضر موضوع كامل وشامل عن حكاية التعليم فى مصر اللى كله عيوب ومافيش فيه اى ميزه .
ياريت بئى كلنا نتفاعل مع الموضوع ده وكل واحد يقول رايه فيه ووجهة نظره اللى شايفها على التعليم يبئى كويس في مصر
وفى النهاية بقول مافيش حد مش بيحب وطنه اللى عاش فيه بس هانحبها لما نحس اننا فى وطنا بتاعنا احنا
