من طرف [ندعوك للتسجيل في المنتدى أو التعريف بنفسك لمعاينة هذا الرابط]
البنوتات الثلاثينيات بيقولوا إنهن كبيرات
وبقوا عنوسات (إيه عنوسات دي ؟ .. مش مهم مشوها كده علشان الوزن والقافيه )
طيب يا أحلى بنات
تعالوا نتكلم بموضوعيه
أي بنت ..وصلت للثلاثين ولم تتزوج .. لماذا؟
أي بنت .شوفوا أي بنت بيتقدم لها عرسان
بس ليه في واحدة بتتزوج بدري وواحده بتوصل وتعدي الثلاثين
بدون زواج
إيه الفرق ؟ كلهم بنات يا جماعه يبقى إيه السبب
في أسباب كثير الحقيقه .. كل واحده تجيب كوبايه شاي أو نسكافيه
أو أي شئ وتيجي .. هنقعد قاعده بنانيتي ههههههههه
البنت اللي وصلت أوعدت التلاتين بتتميز بإيه؟
البنت دي بتكون دماغ يا جماعه
بجد دماغ
غالبا بتكون زكيه جدا
وبتفكر وتحلل وبتفصص الأمور (غالبا النوع ده بيجيب حساسيه لبعض الرجال )
المهم البنت دي
لما يجيلها عريس .. بتبتدي تشوفه بوجهة نظر تانيه
يعني مش بتشوفه مجرد عريس والسلام .. لأ
هى بتكون عارفه نفسها وقدرها وبالتالي بتكون عارفه
هي عايزة إيه بالضبط
وبالتالي اللي بتجد إنه مش مناسب لها بترفضه
وبتفضل ترفض وفجأه وصلت للثلاثين والأربعين
أما البنت التانيه الواعيه مافكرتش كتير
أهو عريس وجوازة والسلام .. ده بيكون رأيها
وأهلها طبعا بيتكفلوا إنهم يختاروا لها من يتوسمون فيه الخير
وتبتدي الحياه بحلوها ومرها
نرجع للبنوتات الثلاثينيات
بترفض ليه؟
أولا الزواج رزق مثله مثل أي شئ تاني
وبالتالي لازم نؤمن كده
إن الرزق اللي ربنا باعته لك مفيش مخلوق هياخده
واللي مش مكتوب لك
مش هيوصلك مهما عملت
وياريت الناس كمان تفهم كده وتبطل تتحشر في اللي ملهاش فيه
يعني لو شخص مكتوب لها .. مهما رفضت هيكون لها
تبقى المسأله قدريه بحته
كل واحد ربنا كاتب له شئ .. هو إيه ؟ هيجي إمتى؟
طيب هيجي إزاي؟
مش شغلنا
والزواج بالذات من قبل ما تتولدي مكتوب هتكوني زوجه لمين وإمتى
يبقى مش لازم نشغل بالنا بالموضوع ده كتير
كمان عايزة أقولك كلمه للمستقبل
قبل ما تيجي ترفض إعرفي إن مفيش شئ في الدنيا مضمون
المهم إننا عايشين
يبقى لازم نعيش صح على أد ما نقدر
من الآخر
يا ثلاثينيه
ياريت تكوني بتشتغلي أو عندك بيزنس صغير خاص بك
ليه ؟
مش علشان الإستقلاليه والكلام الكبير ده
لكن علشان يكون لك دور في الحياه
يكون لك فايده
بصمه تتركيها بعد كده
وعلشان مش تحتاجي حاجه من حد
فاليد العليا خير من اليد السفلي
سمعاكي بتقولي .. هو الشغل بالسهل؟
لأ طبعا مش سهل خصوصا لما تكوني عايزه شغل مناسب لك
بس هقولك حاولي وابحثى وربنا هيوفقك
لأن ربنا بيساعد اللي بيساعد نفسه
سمعاكي تاني .. الله هو إنت غلباويه ليه
آه نسيت إن السمه الأساسيه هي الدماغ
ماشي يا ستي
بتقولي إيه ؟ الأهل مش موافقين ع الشغل ويقولوا إنك مش محتاجه له
الله .. أمال دماع إيه بقى وإنت مش عارفه تقنعيهم
ما علينا .. أوعى تزعلى أنا بهزر معاكي
هو حد قال إنك بتشتغلي لأنك محتاجه
ثم إنت الآن ربنا يخلي والديكي مش محتاجه .. طيب بعد كده لا قدر الله وبقيت لوحدك ..
هتعملي إيه؟؟؟؟؟
فهميهم إنك لما تبتدي الطريق وهما معاكي بيساعدوكي وبيساندوكي
أفضل ألف مرة من إنك تبتدي وإنت لوحدك
المهم يا عزيزتي
طالما إنت عايشه .. يبقى عيشي صح
وافتكري دايما إن مفيش إنسان أخد كل حاجه
فيه اللي لم يتزوج ونفسه يتزوج
واللي تزوج وعايش تعيس
واللي تزوج ولم ينجب .. ونفسه يكون له أولاد
واللي عنده أولاد .. ونفسه يكون أصحاء
واللي عنده أولاد وفقد أحدهم ( لا قدر الله)
واللي عنده أولاد أصحاء .. ويتمنى يكون عنده مال علشان يربيهم كويس
واللي عنده أولاد ومال ومعندوش عمر يكمل معاهم
واللي عنده أولاد وعمر .. وفضل معاهم لحد ما ذاق منهم العقوق
واللي .. واللي .. ياااااااااه
الأرزاق دي ربنا مقسمها كيف يشاء
ياسلام لو رضينا
وتأكدنا إن مانحن فيه هو الأفضل لنا
عن نفسي لسة موصلتش للـثلاثين بس هوصلها ههههههه بس بقول
أنا كده أفضل والحمد لله
قلتي إيه؟
الحمد لله
طيب من فضلك قوليها وإنتي قلبك مبتسم
الحمد لله
