من طرف حبة ورق مبعتره
كلمات كتيره منطوره
والمشكله كتر الورق
ولا الكلام
وكل سطر تحته سطر
مفيش ما بينهم إنسجام
زي المطر
كلام كتير زي المطر
وطبعا زي قلته
كده في الهوا
كلام وبس
نقراه في جرايد
نسمعه في تقرير
وزير مسؤول كبير
او حتى مرزوق الغفير
بيقول برضه نفس الكلام
بنقول كلام وفعل لأ
متعودين بنقوله
من خبرة سنين
ومحتاجين له صوت جهير
مش صوت حمار
لأ صوت حمير
عشان كلامنا تسمعه
يجيلك طرش
وتشوف يدوب تحريك شفايف
تفتكر نفس الكلام
والابتسامه نفسها
نفس الحروف
على الورق قلبي أتسرق
من سحرها
رغم اني حافظاها كلها
بس الحروف متلخبطه
بتلخفنك وتشكك
كإنك سمعته ولا لأ
بعدين تتعود تسمعه
وتسجله وتقدمه وترجعه
إدمان بقه
بيماثل إدمان الشقى
ودي وصفه حلوه عملتها
عشان تعيش زي البشر
تسمع كلام على الغدا
وعلى العَشا
قبل الضحى
بعد العِشا
وإفضل كده 60 سنه
